Newyddion

• Pleser a braint yn ddiweddar oedd ennill un o Wobrau Twristiaeth Eryri Werdd. Cynhaliwyd y seremoni wobrwyo ym Mhlas Tan-y-bwlch ym Mai 2008.
• Rydym bellach wedi ymuno â’r mudiad Slow Food, gan ein bod yn rhannu’r un egwyddorion.
• Clywsom gan Alastair Sawday eu bod yn bwriadu’n cynnwys yn y gyfrol Green and Organic Europe sydd i ymddangos yn ddiweddarach eleni.
• Dyfarnodd Alastair Sawday un neu fwy o’u baneri moesegol inni.
  
• Cyhoeddwyd y bydd cyngherddau Bryn Terfel yn cael eu cynnal unwaith eto eleni yn y Faenol, ar benwythnos Gwyl y Banc olaf mis Awst 2008. Y rhai fydd yn perfformio gyda Bryn yn y Gala Opera fydd Ramon Vargas, Carlos Alvarez, Rebecca Evans, Christine Rice a Gareth Jones. Gallwn dderbyn archebion am ystafelloedd yn Y Goeden Eirin ar gyfer y penwythnos hwn. Byddwn yn rhoi blaenoriaeth i rai sy'n dymuno aros am ddwy neu dair noson. Y cyntaf i'r felin...
• Gwahoddwyd ni i ymuno gyda gwefan 'Wales in Style', ac rydym yn falch o fod ymhlith y lleoedd moethus a dethol sydd ar y wefan honno.
• Dyfarnwyd Safon y Ddraig Werdd inni yn ddiweddar, wedi achrediad manwl gan Rwydwaith Arena.
• Dewisodd Rhwydwaith Arena Y Goeden Eirin fel un o'r ychydig astudiaethau achos sydd i ymaddangos ar wefan Croeso Cymru yn y categori 'Y Casgliad Gwyrdd'.
• Cawsom y fraint yn ddiweddar o groesawu’r nofelydd o Albania, Fatos Kongoli, yma. Trefnwyd taith ar ei gyfer i lansio cyfieithiad Saesneg o’i nofel, The Loser (cyhoeddir gan Seren), a bu’n annerch cynulleidfaoedd yn Llundain, Rhydychen a Bangor. Gwestai i Ysgol y Gymraeg ydoedd ym Mhrifysgol Bangor, a daeth tyrfa dda i wrando arno ef a’i ddau gyfieithydd Canadaidd yn cyflwyno’r nofel. Trefnodd Ysgol y Gymraeg ginio iddo yn Y Goeden Eirin, a chawsom y fraint o’i letya ef a’i wraig a’i ddau gyfieithydd.
• Bu Gweinidog Treftadaeth y Cynulliad, Mr Rhodri Glyn Thomas, ar ymweliad swyddogol â ni ym mis Hydref, yn sgil y ffaith ein bod ar restr fer un o Wobrau Twristiaeth Cenedlaethol 2007. Gan fod yr haul yn tywynnu arnom y diwrnod hwnnw, cafodd ef a’i ddirprwyaeth de a theisennau cri wrth y bwrdd llechen yn yr ardd.
• Mae’r Good Hotel Guide wedi dyfarnu Gwobr César inni. Rydym yn ystyried hynny’n gryn fraint. Dim ond deg o’r gwobrau hyn a ddyfernir trwy Brydain gyfan bob blwyddyn, a chânt eu galw’n ‘Oscars y diwydiant lletygarwch’. Cyflwynwyd y gwobrau mewn parti yn Llundain ar ddechrau Hydref.
• Cawsom ein dewis ar gyfer y Good Hotel Guide 2008 a lawnsiwyd yn Llundain ar ddechrau Hydref. Roedd hyn yn dipyn o syndod, gan nad yw'r Goeden Eirin yn westy yn yr ystyr arferol. Mae’n debyg i arolygydd fod yma yn aros, heb inni wybod hynny, oherwydd mae’r arolygiadau i gyd yn rhai gan bobl anhysbys. Mae’r Good Hotel Guide yn un o’r ychydig arweinlyfrau cwbl annibynnol a diduedd. Caiff ei olygu gan Adam Raphael a Desmond Balmer.
• Buom ar bedair rhestr fer y llynedd: Gwobrau Busnes a Chynaliadwyedd Cymru (trefnwyd gan Rwydwaith Arena), Gwobrau Twristiaeth Cenedlaethol (trefnwyd gan Croeso Cymru), Gwobrau Busnes Gwynedd a Gwobrau Menter a Busnes. Er nad enillasom yr un o’r gwobrau hyn, roedd yn fraint dod mor agos at y brig.
• Ymysg ein hymwelwyr mwyaf nodedig yn 2007 yr oedd y llenor a’r beirniad bydenwog Ngugi Wa Thiong’o. Traddododd ddarlith dan nawdd Adran y Gymraeg ym Mhrifysgol Cymru Bangor, a daeth ef ac aelodau staff yr Adran i’r Goeden Eirin am ginio, a chysgodd yntau dan nenbren ein Cwt Môr, wedi’i gyfareddu gan y doreth o lyfrau Cymraeg ar y silffoedd. Brodor o Kenya yw Ngugi, ac y mae’n enwog am ei ddramâu, ei nofelau a’i feirniadaeth ôl-drefedigaethol. Bu’n gweithredu’n wleidyddol, fe’i herlidiwyd ac fe’i carcharwyd, a bellach y mae’n alltud yn UDA, ac yn Athro ym Mhrifysgol California.
• Ymysg y cymdeithasau sydd wedi bod draw am bryd o fwyd llenyddol y mae Clwb Darllen Caernarfon. Cawsom y fraint o groesawu’r Athro Gwyn Thomas, Bardd Cenedlaethol Cymru, a rhoddodd yntau sgwrs ddifyr am ei hunangofiant, Bywyd Bach.

Mwy o ddyfyniadau o’n Llyfr Ymwelwyr:

‘Noson wrth ein bodd – y cwmni, y wledd a’r gerddoriaeth. Beth all fod yn well na hyn?’ Wil a Lis Davies

‘Hafan hynod gyfforddus rhwng dau ddiwrnod o waith yn yr ardal. Croeso bendigedig a gwledd o frecwast. Mae “Chez Rowlands” yn cystadlu’n frwd â “Chez Dudley”! Diolch am y croeso – a’r silffoedd llyfrau.’ Androw Bennett, Llanarthne

‘Bwyd blasus da. Swper ymddeoliad haeddiannol i Gwenda.’ Margaret, Elen, Anita a Gwenda

‘Croeso ac awyrgylch arbennig iawn. Bwyd rhagorol. Lle gwell i ddathlu pen-blwydd?’ Susan a Hywel, Caergybi

‘Croeso cynnes Cymraeg cartrefol a di-ffws. Brecwast i’r brenin! Byddaf yn cenhadu ar eich rhan.’ Siôn Jobbins, Aberystwyth

‘Noson o ddiddanwch pur – y bwyd a’r croeso yn ardderchog iawn. Llawer iawn o ddiolch i chi’ch dau am gynhesrwydd y cwmni a’r awyrgylch. Dathliad 21 oed bendigedig i Elen.’ Elen, Nia a Dewi Powell, Nanmor a Chricieth